CHAPTER TWO
EBC RETIRED PASTORS & PAIMASATE
REV. DR. GOUZAKAP HATLANG
March 15,1942-August 20, 1998.
1. PIAN LEH PHUNG: Pa Kham-Ai Hatlang leh Nu Ngaivung-te nupa apan Pathian thilpiak, gil a gah goutan a thumna ding in Kaihlam khua ah March 15, 1942 in piang hi. Unau pasal 4 leh numei 4 ahi ua, pasal-a upa pen Nunzakhai himahleh kum 2 vel a phak a hon omlouh san ziak in pasal-a upapen hihna amah tung tukha hi. Apa Pa Kham-Ai ahihleh innsung haksatna ziak in kha 1 kia school kai man mahleh mi lungpi khual mahmah, maban ding saupi geelthei (muhkholhna nei) ahih ziak in laizil poimoh dan thei hi. Huaiziak in singtaang a omsawt hoih salou in 1947 in Kaihlam apan Mission Compound ah a pa'n pem pih in Carpentry, meithal/thau bawl (gunsmith), Mission Guardian (kha 1 a Rs 24/- loh in) leh press ah compositor sem kawm in innkuan vaak hi.
2. BAPTISTNA LEH INNKUAN: 1964 kum in baptistma tang a, May 17, 1968 in Upa Vumzatun Hangzou tanu upapen Niankhoching toh saptuam dan in TE Paul Memorial Church, Mission Compound ah Pastor Rev H Nengzachin khut ah kiteeng uhi. Anupa un Pathian vualzawlna gil a gah goutan tapa 4 leh tanu 3 nei ua, amaute:
