Kum hongthak a, bangmahpi kikhekna a omtuan kei. I niteng nekzonna leh khosakna chiat uah i buainawn sauhsauh uhi. Innlam lam a program tuamtuam neih ziak leh thil dangdang ziak a paite le nou gimgem in hongtung nawn panpanta uhi. Nidang a train khawng a haksa tak paia ni 3/4 phialphial lampaina a izat bei lai un tuchiang in Lamka apan Delhi ah nitak ann delh ban in i omta uhi. Kikawmtuahna a baihlam ziak mah in simlai hi’n a semte hitaleh suty tomchik neite leng innlam i pai zatzat theita uhi. Hampha tak ihita uhi.
Kum thak leng theihlouh kal a hong bei zungzung ding ahihziak in i sep ding/i hih dingte kizekai saklou in hih pahpahni. Kha 2/3 zoh chiang in siamsin laite’n etkhiakna (exam) neita ding hihang. Khovot khawng suan lam in laisim kizekai sakkeini. Khua hong lum leh haksa law zel ding ahi. Tu hun laisimna dia hun hoihtak ahi, saptuam leh pawlpi vaite ah leng program lian a omlouh hun laitak zong hi ding hi. A om khak zenzen le zong laisim mah ngaih poimoh hun ahi.
Employment News a competitive exam result kisuahte khawng i en a, imi-sate min a om khak chiang in nak noplua. Khat-le-nih min i muhchiang in adang le omlai leh i chi a, khat le a omlouh chiang in khatbeek omleh kichizel hi. Lungkim chih omthei ding abang kei. I kideihsak luat ziak hi e. Competive Exam te a lutzou nawn manglou ihita uh hiam i chihlai a tutung SSC-CGL Exam ah bangzah hiam lohching i omziak un kipahhuai mahmah. Sepna neita chihphetlouh Saptuam leh Pawlpi khawng a i zat mahmahte bang, zi-le-ta neisa laisim man nawn taktak dia i ginlouhte khawng bang leng hong lohchin chiang un lohchinna kua a hituan lou ahihdan muhtheih. Full time a laisim theilaite kisak thak tuaklua. Sorkal in kam zontheihna ding kum bikhiah nei ahihman in, sepna zong dingte kizekai sak keini. Kum kikhel nung a zaw a simthak peih tawk lele chance om nawnlou ding hi.
Sepna neisa - Private hi’n Public Sector hitaleh, a sangzaw lunggulh a competitive exam khawng i piak utleh laubawl mawk keini. Semkawm ale competitiive exam gelhching ana om lua ahi. Eilak mahmah ale. I gam/Zoudawn siamsinna puksia i awlmoh ua, panlak theih dandan in pan i la uh. Ahoih. Huchihlai in Delhi a i homework uh mangngilh keini. Tunung chiang a i gam-le-nam leh khotang makai ding tampi tak tua Delhi a om ahi chih thei in amaute kul leh poimohte leng kitheihmohbawl kei hialni.
[Siamsin Bulletin: January 16, 2011]
No comments:
Post a Comment