DELHI SIAMSIN FRESHERS’ WELCOME LEH CAREER GUIDANCE HUN ZAT HIDING

Siamsinpawlpi Joint Headquarters, Delhi inntekna toh ahongtungding kiginni, August 20, 2016 ni in Jawaharlal Nehru University Convention Centre ah ‘Education for a Positive Change’ chih thulu zang in Freshers’ Welcome leh Career Guidance hun zatna omding hi.

Hiai hun ahihleh Hoihnu Hauzel, Biaklun Thawmte, C Sanga, Grace Siamlianvung,
Dorothy Niangkhannem Guite, Siamsang Vualnam, Dr. Rose Nembiakkim, Vumlunmang Vualnam, N.Chinsum, Khatchin Langel, Khamkhansuan leh Rev. Kamzamuan te’n Guest Speakers hihna toh uap in Siamsin te ding a thu poimawh leh manpha te genna nei ding uhi.


L.Khammuanlal, President, SSPP Delhi apan thutut kimu in a taklat dungzui in hiai hun zatna ding toh kisai a kisakkhawlna poimawh om te zawhsiang hita chi a, aman hiai hun a Delhi Siamsin a tamtheipen kihel ding leh hun seh a om zang phatuam ding in member te tengteng chialna bawlngal hi.


Detail programme ahihleh sawtlou nung a khahkhiat hipan ding ahihdan leng President in gen hi.
Zoflami, Melody Hmar Varte, Mary Lun Naulak, Pyr T, Pastor Biakson, Siamsin Tulmoh leh Shakti Trust Foundation ten leng hiai hun zatna Guest Artistes hihna toh uap ding uhi. Hiai hun ah Mr and Miss Fresher 2016 leh title tuamtuam kitelna leng neih hiding ahihdan vaisai te apan thu zak ahi hi.


Education Department apan thusuak dungzui in tutung freshers te min kaihkhawmna hun a min pelut te et in Delhi a siamsinna sangzaw leh maban sunzom ding a paithak siamsin mi-le-sa 50 vel dia hisap theih ding ahihdan gen in om hi.


- Siamsin Bulletin | 14th August 2016