- K. Pauginmuan, Newlane, Bungmual, Lamka. Khovel ah khang touhna om theihna dingin, ki kawmtuahna poimoh mahmah a. Eilam inle ki kawmtuahna ding in Len¬na ki hahzat mahmah ta a, himahleh lenna lam (Aviation Industry) tam ki thei khollou hi. Huaiziak mah ahi diam ah Lenna tuan ding pumlauh a hun khop ki om hi. Khovel a khangtouh dungzui in, lenna tuang kia hilou in lenna hektu a pang theihna ding kong leng ki hongzel sam hi.
Pilot hih theih na ding in Licence neihngai a, Licence chi 4 in ki khen hi. Amasa pen in, Flying zil patna ding in Student Pilot Licence (SPL) ngai hi. Hiai Student Pilot Licence pen Flying Training hih theih na ding a poimoh ahi. Huai zoh, Private Pilot Licence (PPL) neih theih na ding Flying experience dakkal 40 leh PPL exam pass ngai hi. Private Pilot Licence I neih chiang in dan bang in lenna in mi ki pothei ta a, himahleh a lenna tuan¬man nei dia mi puak theih nailouh, summuh na ding (Commercial Flight) in ki zang thei nailou hi. Commercial Pilot Licence (CPL) neih theih na ding in, CPL Exam leh Flight Radio Telephone Operator Licence (FTROL) exam pass ngai a, flying experience dakkal 200 banah Flight Test tuamtuam leng pass ngai hi. Hiai Commercial Pilot Licence i neih chiang in, kaam ki zong thei pan hi. Huai ba¬nah, Airline khong ah Commander hih theih na ding in Airline Transport Pilot Licence (ATPL) ngai non hi. Hiai neihtheih na ding in flying experience dakkal 2500 neih banah written exam leh Oral exam pass ngai.
Commercial Pilot Licence (CPL) Course zil theih na ding a poimoh te:
1. Class 12 Science (Physics leh Maths) zoh ngai hi.
2. Class 1 medical fitness (Class 1 Medical Assessment masa pen Airforce te Medical center apat sese hih ngai a, huai zoh kumteng in Approved Center ah Medical Assessment neih ngai hi)
Pilot zil theihna ding mun india leh foreign ah mun tampi om hi. India ah sem te a ding in Indian CPL ngai a, Foreign ah CPL zouten a licence uh Indian CPL a kheksak ngai a, huai khek theih na ding in exam a piak masak uh ngai hi. Indian CPL neih theih na ding in flying experience dakkal 200 neih ngai a. CPL Course zoh na ding in a tangpi in Rs. 20 lakhs to Rs. 40 lakhs vel bei zou hi.
India ah ST te dopsang na ding in Scholarship chi tuamtuam om a, huai te lak a CPL Course leng telkha hi. CPL zil theih na ding in ST Scholarship chi nih ana om a, Post Matric Scholarship leh Top Class Merit Scholarship. Post Matric Scholarship for CPL pen Ministry of Tribal Affairs te website leh Employment News khong ah July-August kim lak advertisement omzel hi. Top Class Merit Scholarship pen ahih leh, Government Approved Institute khenkhat (Indira Gandhi Rashtriya Uran Akademi chih khong) ah admission mu te lak a ST mi 5 tan scholarship pe zel uh hi. Lamka apat mi 4 in scholarship tungtawn in CPL zouta a, huai te lak ah mi 2 a Post Matric Scholarship for CPL leh mi 2 a Top Class Merit Scholarship ahi. (Top Class Merit Scholarship pen tua subei a omta hi a theih ahi)
Commercial Pilot licence (CPL) neih zoh chiang in kam zong theih pan hi. Pilot te a ding in Airlines leh Company te a lut theih dan tangpi chi nih om, a masa pen CPL Non-Type Rated leh CPL Type Rated ahi. Com¬mercial Pilot Licence neih nung in, I lenna hek di zil in training ngai non a, hiai pen Type Rating ki chi hi. Gentehna ding in, Boeing 737 hek theih na ding in, Boeing 737 Type Rating neih ngai hi. Type Rating Course hih na ding in Rs. 15-30 lakhs khong bei zou hi. Airline te leh Company ten kam awng a neih chiang un, advertisement hon bawl ua, huai te apply theih mai hi. Recruitment process paidan a tangpi in Psychometric Test, Writ¬ten Test, Personal Interview leh Flight Simulator Test ahi. Hiai teng a I pass suak leh, job offer hon pia uh hi. Non-Type Rated I hih leh, I join ma hiam I join nung hiam in I join na company te lenna penpen ah Type Rating hih ngai teitei hi.
Airlines/Company I join chiang in, in-house training ngai non hi. Amasa in kha 2 vel ground training hon pe masa ding ua, huai zoh Flight Simulator ah dakkal 32-64 vel training leh Check om ding hi. Hiai teng zoh chiang in Base Training ki chi, lenna liante ah 6 vei take-off leh Landing Check om non ding a. Huai zoh Observation Flight (Commercial Flight te a Cockpit sung a thil paidan etkhiatna) sector 15 ah pai ngai a, huai zoh chiang in Supervised Line Flying (SLF) pai ngai non hi. Supervised Line Flying pai chiang in, instructor khat toh ki leng ding a, huai in sinsakna leh etkhiatna hon nei ding hi. SLF kha sector 70 vel pai ngai ding a, huai I zoh chiang in Flight Test om ding a, huai I pass chiang in First Officer ki hi theita ding hi. First Officer I hih chiang in Training taktak zou ki hita ding hi. Himahleh, kumteng in Refreshers Course Training neih ngai a, huai ban ah tuuk (Monsoon) hun tung ding chiang bang, phalbi meikai di kuan chiang bang in kisak kholh na dan in Training sawt lou neih ngai non hi. I septheih hun sung, a vangkim in Training om den ding hi.
First Officer a kum bangjah hiam sem a, Flying experience dakkal 2500 vel I neih a, Airline Transport Pilot Licence I neih chiang in, airlines ten a poimoh dang in Command Upgrade Training hon pe ding ua, huai zoh chiang in Commander ki kai thei ta ding hi. Commander I kai chiang in, Flight a I pai chiang in a responsibility tengteng ei khut ah kinga ding hi. Lenna bitna ei khut ah kinga ding a, decision tengteng ei khut ah kinga hisim mai hi. Commander a experience hunkhop i neih chiang in, Instructor leh examiner ki kai tou thei ding hi. Pilot te a ding a bultung in laisim tam poimoh mahmah a, career sung in training ngai den a, technology a khang dungzui in ei leng ki update ngaiden hi.
Lenna in Engine bangjah a nei a? Lenna in engine a neih zah ki bang vek lou a, a lenna na zil in engine a neihzah tuam. A tangpi in, passenger pua lenna ten engine 2 nei hi.
Lenna Engine khat se leh a leeng thei diam? Lenna engine 2 nei te, a khat pen se leh leng, engine khat vuak in leng thei a, buaina omlou in boh thei hi. Huai ban ah, gam chih in amau gamsung a Aviation dan ki bawl thei chiat uhi. Huai dungzui in, india a lenna lam a dan bawl leh enkai tu Director General of Civil Aviation (DGCA) ki chi a, amau lenna leh a tuangte a bitna ding ngaihtuah na in dan bawl in, enkai uhi. Tua india a rule ki zui lel pen dan in, lenna te a leng dek chiang un, a lampi uah engine bang se ta le, dakkal ahih kei le minute hiai zah (a dakkal/minute hiai zah chih kha a lenna ah kinga, a tangpi in dakkal 1 - 2 ahi) sung a bittak a a boh theih na ding uh airport om ngai, huai lou in huai lampi tawn a leng khe thei lou ding uhi. A omdan tak chu, lenna a leng khiat nung in engine khat bang se ta leh, dakkal 1-2 sung a airport khat boh man teitei ding chih ahi.
Lenna Hektu bangjah: Lenna hektu phazah a lenna ah a kinga, lenna engine khat neite a hektu khat chouh le hi thei. Himahleh, len¬na engine nih leh engine nih sang a tam zo neite a hektu nih ngai dia kibawl ahih ziak in a hektu mi nih ngai hi. A lenna hektu mi 2 te naa kibang lou a, etkai ding naa a tuam tuak a om hi. Lenna a lengkhiat ma in leh a boh khit chiang in, Captain leh First Officer naa in ki khen a,a leeng khiat khit chiang in Pilot Flying leh Pilot Not flying chin ki khen hi. Gentehna ding in, Pilot Flying in lenna heek ding a, Pilot Not Flying pen in a lampi di a tawn kha na hiam, a lenna vanzat ten a hi di bang in na a sem na hiam, Pilot Flying pen naa etkaih pih leh Air Traffic Controller te toh ki houna naa ana sem, a system teng a paiding dan in na paina hia chih etkai ding chih khong hi tangpi hi.
Lenna a lenglai a kising (turbulence), feet bangjah hiam ke guih chih te a lauhuai diam? Lenna I chih tuipi a long kilaam dan a huihkhua a kilam chih theih ding hi. Vanlaizawl a meipi tuam dan zil bang, kholum dan zil bang in huih nung dan kibanglou hi. Huaite ziak hong a kising leh keguih chih te om thei a, lauhuai lou hi. Aziak ahih leh, pilot ten Radar leh weather charts tuamtuam te zang in en thei ua, a lauhuai thei di te hon pelhpih jel uh hi. Lenna a lengkhiat ma in, airport a kho om dan, a lampi a kho om dan, airport a bohsom na ua kho om dan leh alternate airport ( a bohsom na a a boh theih kei zenzen leh a boh theih na ding airport) a kho om dan te a banban in hon enchian masa ding ua, huchia lauhuai na ding omlou ding a chih chiang ua lengkhe dia kisa pan ding uh ahi.
BIO-DATA
Min : K.Pauginmuan
Pa Min : (L)K. Khatsong
Nu Min : Singnem
Address : Newlane, Bungmual.
School kaikhakna te
1. Class X tan : Hermon English School
2. Class XII : Rai School, New Delhi
3. Graduation : BA Economics , IGNOU
Tua sepna :
Air India Express ah Trainee First Officer.
No comments:
Post a Comment