SIAMSINNA LEH TU DINMUN
- MANTHIANMUAN
Leitung a i hong piangkhiak a kipan in mihing te'n i nute apan in siamsinna kipan ngal hi. Siamsinna pen innsung a pan in kipan masa hi. Innsung a i zil leh theih khempeuh zong siamsinna a dia bul kipatna hipah hi. Thil i theihlouh leh thil bang hiam theihbeh diing asinna pen siamsinna ahi hi.
Mihingte pen siamsinna omkeileh nidanglai a i pu-leh-pate'n hinkhua ana zatte uh mah tu hun in kizangtou diing hi. Khanlohna bangmah om louh diing ban ah i i tawndan hi in thil bang peuh hita leh kikhek lamdangna omkei diing a, hinkhua mawltak ina zang lai diing uh hi. Himahleh, khanlohnate hong om in itawndan luite uh bang zui nawnlou in hinkhua thakte bang i hon zat chiang un, siamsinna diing skulte bang hong om thei in neulai apan in siamsinna mah kipan hi.
Khovel ah mihingte siamna sang toutou in thillamdang pipi zong hong omta hi. Hiaite siamsinna omkeileh omlou diing hi. Siamsinna ziak in meel muh louh tongsan tulai pau a mobile phone i chih uh bang bawlkhiak in om kei diing hi. Tu dinmun a diing in mobil phone a zangsiamte a diing in a siamsinna uh panpih mahmah hi. Himahleh, a zang siamloute a diing in bel a hun uh lak mang sak tu suak thei leuleu zel hi. Thil i neih khempeuhte zatsiam kiphamoh mahmah hi.
I siamsinna uh nidang toh teh diing in tu dinmun a i siamsianna uh hoih lo vaklou hi. Tu dinmun in bel technology lam ah khantouhna lian mahmah hinapi in skul naupangte laisimna lam amau zatsiamlouh ziak zong ahi ngei diing a, sesak zou mahmah hi. Tu dinmun et in eimite bang IAS chih leh a dang tampite ah muh leh lohching a theih om nawnlou hi. Ei mite'n i siamsinna loute pibawl zawta. I tu dinmun uh et in skul kailai naupangte'n pan ilak thak uh kul mahmah hi.
A tung a igen i siamsinna uh tu dinmun et in hoih lo vak lou ichi hi. Himahleh, a hoihna zong tampi om veve hi. Mihingte i lunglutna chiat bang zui thei dia i om pen hoih leuleu hi. Lai kia sim pen zong maban a lohchinna thupi tak ngah diing chihna hi tuan sese lou hi. Pilna leh siamna i ngah theih na diing inle siam mah kisin hi. Mi nuai a i om louh na diing in zong siamsinna mah poimoh hi
MANTHIANMUAN
FIRST POSITION ON THE ESSAY WRITING COMPETITION HELD BY SIAMSINPAWLPI RAYBURN HIGHER SECONDARY BRANCH, ON THE TOPIC OF "SIAMSINNA LEH TU DINMUN"
No comments:
Post a Comment