SSPP 65th FOUNDATION Day Programme

SIAMSINPAWLPI 65TH FOUNDATION DAY -CUM SIAMSIN MERITORIOUS AWARDS DISTRIBUTION & PRESIDENTIAL ELECTION

P R O G R A M
The 13th of January, 2012

Venue : SSPP Residential School, Ngathal
Time : 10:30 am to 2:30pm
Voting time : 10:30am to 11:30pm
Presiders : Nengbiaklal & Chingmuankim
Musical Prelude : Song leaders

DELHI SIAMSIN KHAWMPI ZOH HITA

Siamsinpawlpi, Delhi akiphuh nung kum 30 chingta. Apaita Oct. 29, 2011 in “30 Years of Delhi Siamsin” chih puanzak nuai ah Conference cum-Workshop on Career Opportunities in various Sectors” zatna Shah Auditorium, Civil Lines ah neih in om a, lohchingtak a zoh ahi ta. Delhi Siamsin 1500 vel paikhawm hi’a tuat ahi. Zomi sunga pawlpi tuamtuam te leng chial in om a, hunkhop hong kihel thei uhi. Banah, innlam akipan lasiam Lia Vungthiankim leh Lia Donny te’n leng hiai khawmpi hon sim ua, zaila toh Delhi Siamsinte hon kithuahpih uhi. Tutung khawmpi a kumdanga banglou, thil chituam mahmah khat sai in om hi. Hiai Red Carpet Photoshoot, paite.org te sai ahi. Khawmpi siim dia kuan, nampuan toh nalhtak a kizemte programme zatma in, hall kong a limlakna om hi. Nampuan toh Siamsin te i etlawm thei mahmah uh!

Report: Delhi Siamsin Sport Meet - 2010 Photos+POINTS+Kipahthugenna

SIAMSIN SPORTS, 2010 | INNPI-TE’ POINTS MUHDAN

INNPI TUIVEL TUIVAI LANVA NGAZAM
Football (P) = 1st Ngazam & 2nd Tuivai
Football (N) = 1st Lanva & 2nd Tuivel
Volleyball = 1st Tuivel & 2nd Lanv
Basketball (P) = 1st Tuivel & 2nd Ngazam
Basketball (N) = 1st Ngazam & 2nd Lanva
Tug of War (P) = 1st Tuivai & 2nd Lanva
Tug of War (N) = 1st Ngazam & 2nd Tuivai
100M (P) = 1st & 2nd Tuivai & 3rd Ngazam
100M (N) = 1st & 2nd Lanva & 3rd Tuivel
Marathon Mixed = 1st, 2nd & 3rd Ngazam
Relay Race = 1st Lanva & 2nd Tuivel
TOTAL
TUIVEL = 75
TUIVAI = 67
LANVA = 102
NGAZAM = 102

Overall Champion: Lanva leh Ngazam (Joint Winner)

GP CONSULTANTS IN AIZAWL YOUTH NEXUS THUPI TAKIN SAI

Ginomna, taihmakna, nuamtawl taisan ngam dinkhosuahna lampi ahi.
- Vanhela Pachuau,IAS, Chief Secretary, Mizoram

December 19,2009 a Vanapa Hall, Aizawl a Global Placewell Consultants sai, Aizawl Youth Nexus-2009 (career guidance program) ah khuallian in Pu Vanhela Pachuau IAS, Chief Secretary, Government of Mizoram pang hi. Aman tulai khawvel pilna leh theihna khangtou zelah, mi ginom, taima leh khawvel noptalnate taisan a mahni innlum apan kia hilou, gamdang leh siamsinna hoihzaw delh a taingamte ading kiain lohchinna a awm chiin mipi paikhawmte hanthawn hi.

Aman a genna ah, I gamah siamsinna te neiin, degree sangpi pi kipe thei mah lehang, theihna taktak pawsuah dinga I vanzat te’n chinlou hi. Tua banah, I society paidanah nuamtawlna leh huau huau a tam manin, pichin tak tak haksa ahih manin, theihna vantang, mi tungtuang te ading louin kumpi na hi’n private a sepna hileh muh haksa ahih dan gen hi. Mizoram ngial houh, Central sum a kinga a, ei sepkhiak omlou ahih mana mahni pilna leh theihna zang theiloute dinga sum leh pai zon haksa ahih tak dan theih poimoh ahih thu uangtakin gen hi. Hiai bangte thei a GPC in gamdanga siamna sangzaw delh nuamte dinga lampi a sial pen tu leh tu a lamet banglou ahih leh leng, mailama kulkal taka pang a, lungke mai lou panla zel dingin hasuan hi.

Delhi: 29th Siamsin Annual Conference 2009 Beitaa..

A ngaklahhuai, Siamsinpawlpi JHQ (D) saina in XXIX Siamsin Annual Conference 2009, apaita Kiginni, 31st October 2009 ni in Mavlankar Auditorium, Rafi Marg, New Delhi ah nuamtak mai in zatkhit hita. Limlaak kaihkhawm hilel a, i blog uah hong kikoih pah ta ding. Hiai ah Report leh limlaak nengchilik ana en in...

091031 29th Siamsin Annual Conference 2009

Official Report: 29th Siamsin Conference

Report tomkim: Delhi Siamsinte’n haibang angaklah uh, a 29-veina Siamsin Conference tuang hong tung nawnta a. Oct. 31, 2009 ziing athoh ua kipan, Delhi Siamsinte’ ngaihtuahna ah Office kai di, ahihkeh College kai di, ahihkeh sep diing dang himhim a lungtang uah a om kei a, himahleh a duang ua kibaat diing nampuan buaipih in a ngaihtuahna uh a thuneihkhum hi. Huchi’n New Delhi mun lailii, Rafi Marg a om, Mavalankar Auditorium lamzuan in hong kipan khe diamdiam uhi. Siamsin nampuan toh kizeemte’ etlawm dan phamta Siamsinpawlpi Ai-nah phahtute’n mu hile uh, amaute’ sul zui a siamsin mabang pan te, “Nua chiang a i phungpi huai ding…” chiin akha uh amuang mahmah d’un aginhuai…

Ziing dak 11 agingta a. Hun-uk Tg. Kamkhansiam Ngaihte leh Lia Niangpi te’n Siamsinte chibai buka avaidawn zoh un, “Dialdial in (hun-ukte’n)…. Diamdiam ni (mipi’n)” chih (slogan) samna mipi’n kinei zuazua hi. SSPP JHQ Delhi Executive Committee (leh Dove Quartet!) te’ pii in mipi’n Siamsinpawlpi Lapi sakna kinei a, sakzoh toh kiton in Pastor Khamkhanchin Ngaihte in Pathian kianga thuumna toh hun hong hi.

Pu Joyful Tonsing, President in Presidential message genna nei hi. Aman, mipite vaidawnna’ chibai bukna nei masa in, Delhi tana Siamsin dia omkhe theite’n tuni chiangchiang in i ngaihdan uh khek a hunta, tupna saangtak nei a, first class officer tan beek tup a neichiat di’n Siamsinte chouna bawl hi. Aman, mipi’n leng kumteng a Sports leh Conference neih zeel pen pawlpi hatna leh hatlouhna tehna dan a zang nawnlou diinga i ngaihtuahna uh khek hunta ahihdan gen hi. Tua banah, tukum pailel sunga SSPP JHQ Delhi tup-le-ngimte bangzah hiam puankhiakna nei in, tukum i thupi diing uh, “building relationship” hi nawnlou a “Building People” ahihthu puankhiakna nei hi.

Khual zahtaak hihna toh conference hong uap, Pu CL Ruala, MP (Lok Sabha) in thugenna hun la in, “noute adia MP ka hi” achih pat leh mipi kipak in ki awng zuazua mai hi. Zomi (Mizo) te kipumkhat a, pankhawm a, unau khat ihihna uh phawk hunta ahih thu gen hi. Aman Siamsinte hanthawnna thu tamtak leng gen hi.

Siamsinpawlpi FC te mellahna leh Jersey honna, Sub-committee for Tamchon Memorial Football Trophy, 2009 (SSPP JHQ Delhi) a vaisaite’n nei uhi. Coach Pu Paukhanlian Paite in Jersey honna nei in, tuazoh in player-te mellahna leh putlakna nei zom ngal hi. Tua teng zoh in, sub-committee a vaisai te’n SSPP FC fund raise na dia kibawl T-Shirt (Jersey) zuakna nei in, tamtakte’n SSPP FC phungvuhna di’n tampi in lei uhi.

Huchiin, Khuallian Pu Oscar Fernandez, MP & Chairman, Parliamentary Committee on Human Resource Development in thugenna hun hong zang hi. Aman, Siamsinpawlpi te laka kihel nuam asakthu a gen kawm in, Delhi a omte’n Lamka lama na mi-le-sa te uh adia banghiam na sepsak diing uh ahi, chi hi. Delhi a tuma leh tunai chin a Northeast mite laka thiltung toh kisai agenna ah, Pu Oscar Fernandez in Delhi CM toh kimu in Northeast mite, abik in numeite, galmuang taka a om theihna diing ua panlak ahihthu gen hi. Tu lel a North Campus a NE te adia Girls Hostel kibawl lel ahihdan agen kawm in agei nai a Northeast te aa diing mah a Boys Hostel kilam diing ahihthu gen hi.

Sunnung hun zatna ah, Education Department makaih in Siamsin Quiz khantouh vaaitak a sai in om a, lunglut huai mahmah. Tua zoh in Pu Tunkhanmuan, Secretary in tomkimtak in Secretary Report piakna nei hi.

Huchi bang kawmkal ah, eimi laka lasa siam leh Video Album khenkhat a achangtute omdan chiinna, Phurphutte’n, “Medley Music Video Flashback” chih minvuah in hong show ua, mipi suphur mahmah uhi. Upa lam deuhte nasan in leng a sakhau/zabawm ua kipan romol lakhia in a mit uh nul hial dan uh ahi.

Huai ban in: Parliament House bang hileh, session adjourn theih hial di khop a kikalhna – debating competition – sousang tak, “Lochinna di’n Siamsinna’ mun ah akinga” chih thulu zang a neih in om hi. A gumlamte’n agen chia dik zeel, alanglam in agen chia lah dik zeel ahihman in ngaikhetute buai petmah uhi. Atawp in, Speaker Pu N Vumsuan in thukhenna bawl haksa sa ahihman in, mipite kiangah Ayes or No chi a panna lam uh kikoupih diingin ngetna bawl khong hi. Aman mipi kikou ngaihdan tehna (decibels) zangin thukhenna bawl hi.

Tuazoh in, YPA Joint Headquarters, Delhi in mi phatuamngaite pahtawi-na hun zang uhi. Hun bangtan hiam paita akipat tuhun tana phattuamngaihna suah a, panpih ngaite panpihna dia kalsuan, abiktakin, damlou sisan piak ngaite kianga sisan ana pete kiangah YPA JHQ Delhi in Memento kilawmtak piakna nei uhi.

Hiai programme zat hunsung in Sinna lam chituamtuama siamna tungtuan ngah, Siamsinte lak a telkhiakte kiangah Education Deptt. in Meritorious Award hawmna leh kipahman tuamtuam hawmna nei uhi. Thu-zoh-laa- laa-zoh-thu chih formula zui a programme kibawl ahihman in mipite’ mit leh bil tai mahmah hi. Huan, a lunglut huai mahmah khat ahihleh, Pupa lam ahihkeh, zangtalam a nu-le-pate hong lam khawm datdatna uh ahi. Upa lam deuhte bang lungleeng heuhau a om nenulh daan uh ahi.

Pu Khamkhanpau Guite in Pathian kianga kipahthu genna toh hunkhak hi.

******
Kipahthu: Conference zatna diing toh kisai in sep diing, sai diing, ngaihtuah diing tamtak a om hi. Huaiziakin, mohpuakna mi tuamtuam kiangah akihawm tiltel hi. Tuate’n feltak leh thazohtaka ahon hih buching man un kipahhuai petmah hi. Auditorium book na dia panla te, Programme committee & co-ordinator, Music leh Sound lam saite leh buaipih te, lasa leh kipolhlimna tuamtuam saite leh zan sawtnung tanpha gim-le-tawl khawksalou a kisakkholte, Usher-te, banner design bawlte, badge design bawlte, leh tanmun tuamtuam leen te, banah, tha-le-zung leh hun tamtak seeng a programme adia kisakhol a pangte tengteng tungah kipah thu chiamteh ahi.

Banah, Conference zatna diingin sum tamtak bei diing ahi, chih ithei chiat ua, huaiziak in, innkuan chih/michih te income dungzui in sum donna akinei a, ithohkhawm siausiau man un Delhi Siamsinpawlpi member tengteng tungah kipahthu Executive Committee in hong kigen thakthak hi.

Huan, i thohkhawmte un daih zoulou ahihman in sponsorship zon ngai hi. Huchi’n Pond’s leh Nokia te ahon sponsored man un kipahna alian mahmah hi. Hiai adia mi’ maitang hon siksak Pu Biaklun Shoute (adviser) tung ah leng kipahthu i gen hi.

Awle, phattuam ngaihna ichih veina leh awlmohna akipan hong piangkhia, mihinpihte’ adia thilhoih hih lunggulhna neite’ nasep ahi, chi ni. Tua bang phattuam ngaihna nei thei zeel di’n Tung Thianmang in lumbang hong sung hen!!

******

~ SSPP JHQ Delhi [ssppnet]

SSPP Delhi Sports Meet 2009 | BEITA

091002-03 MainDay1 Siamsin Sports Meet 2009

091002-03 MainDay2 Siamsin Sports Meet 2009

Siamsinpawlpi Delhi kahiang Sports Department malakna toh kumteng a Sports Meet a kineih zel bang in tukum leng geelkholhna bang in 25th leh 26th September 2009 ni te in Basket Ball leh 2nd leh 3rd October 2009 ni te in Jawaharlal Nehru University (JNU), New Delhi ah lamzangtak, khiatlahhuaitak leh golhchiattak mai in zatkhit hinawn ta.

Anipini 2nd October '09 ni in Pu Haukhum Hauzel, IAS leh Anitawpni 3rd October '09 ni in Pu Thangso Baite, MP (Outer) Manipur, ten Khuallian (Chief Guest) hihna toh hong uap uap ua, "Siamsinpawlpi in sum taksap man hituanlou in" chia Pu Thangso Baite in a gen bangin, SSPP Delhi te vai dangka hunkhop in hon phungvuh tuak uhi.

Kimawlna tengteng a vualzohna tuamtuamte kigawm a VUALTUNGTUANNA ngah T GWITE INNPI hi ua, amau Pu (L) H Remthang Memorial Trophy leh Cash ngah uhi. Apipen a kineisek Football match ah Pu Jamkhothang Innpi in Pu T Gwite Innpi te goal ah goal nih khum in Football ah Champion hi uhi.

Kimawl lunglutte ading in, a kisakkholhna te uh banah SportsMeet ni a hongbei ninawn apan amei-apa chi-leh-sa golh zengzung, ekbuk tut haksa sa atam dan apan khong in, a ngaklahhuai dan, anopdan leh a khiaklahhuai dan chet theih mahmah hi. Lim kila muhding alang alang om den ten leng a aamhuai dan genkhin mahmah hi.

Tutungin a neulam deuhte LIANDOU leh THANGHOU Team a khen in Football neih in om hi. Sutzop tuak mahmah hi.

Ei singtangpa laalui leh chiik taktakte lum zungzung a khah khiak hiden a, Papi leh Nupi khenkhat lungleng omngei dia gintak ahi.
Hiai sports sung in nek-leh-taak kiningching tak a sai ei singtangmite mahmah apan in - sa minsa, satuihang, ann, colddrinks, tui, kuva leh adangdangte baihsam tak in leitheih ding om den hi.

Huchi kawmkarah, hiai ni in Delhi a thang mahmah ei tualsuak mahmah TShirt tuamtuam muh ding tam mahmah, htt*- Arsenal [Modified Jersey], North Zomi, The Floppers, The Singtangmite [all edition], Zogam.com [both editions], Zogamonline etc. Tam semsem leng anuam hi...

A lehlam ah, ei singtangmite ngeina hihetlou in, nin paihna di a pailou, kuva tui baang ah se san zezua, thu omlou a mawk kikou leh i dawnna bawmte apaihna mun ding i theihlouhsek ziak un, i Sports zatna mun te uh Alpha leh Omega hikha theisek pen, thu kiza danin tutung inle vaaite i bat dekdek ziak un, maban ah Ground neiten ahon phalnawn di ua aw...chih sim in a om hi.

Hun kidaihlouh ziak in Chess Final zohlou in om hi. Banah, kimawlna khenkhat ah vualzou hihna kipahpih thilpiak (Prize) ding om mahleh, kimawlna khenkhat ah a omtheihlouh sek pen poi mahmah hi. Siamzawng (talent) tuamchiat leh lunglutna kibang veklou ahihna ah tha-leh-zung seng a lungluttak a ana pangkhate a ding in thazoihuai mahmah thei dinmun in om hi. Huaibanah, kum dang banglouin, tukum in Basket Ball te saikhit himahleh, sports hunsung in kum dang a kisaisek khenkhat sailouh in om a, kimawlna khatkia i.e. Football lam ah nasa tak mai in deihsakna piak hi a muhtheih in om hi. Football hongbei toh kiton in sports beituka ngaih in om a, himahleh hiaihun in Deente (throwball) final kimawlna bei naikei mahleh Prize Hawmna pat in om mawk hi. Khenkhat in thazoihuai asak thu gen uhi. I Pawlpi ah i lunglut chiat sem theihna ding in maban ah hichibang neu chikchikte leh hou chikchikte chiamteh tuak mahmah hi.

Bangteng i genhang in hiai, hiai hunnuam tak mai, aneu-alian atek-akhang nupi-papi nungak-tangval te ading in kumkhat a khatvei sunsun thoveng taka a lompi a kipolhkhawmna, kimuhtuahna leh kimeltheihna ahihsek manin, amanphat dan sum-le-paai a tuattheih thil hilou hi. I Pawlpi it a, buaina leh haksa tampi thuak a kal ana suan Vaipawte ziak a hiai bangteng hong piang ahihdan kuapeuh in theihsiam chiat leh deihhuai hi. Pathian in i Pawlpi tungtawn in a ITNA hon langsak zel ziakin Amah kiang kipahthu gen chiat ni.

Apini in leh atawpna dingin Pa T Thiankhanmuan leh Pa T Kaithang ten Thumna in Ngetna leh Kipahthu genna toh Siamsin Sports Meet 2009 laan khia uhi. Thank God.

Delhi Siamsin Annual Sports, 2009: CHIALNA

- Sports Department, SSPP-JHQ: Delhi [SSPPNet] Siamsinpawlpi, JHQ Delhi in, October 2 & 3, 2009 sung, JNU Football Ground ah, Siamsin Annual Sports Meet, 2009 kizat sawm hi. Hiai hun in kimawlna chi tuamtuam sai hi diing hi. Opening Ceremony October 2, 2009, 0900 hrs in om dia, Closing Ceremony October 3, 2009, 1700 hrs in neih hi diing hi. Opening Ceremony hun ah Pu Haukhum Hauzel, IAS, Financial Commissioner in Chief Guest hihna toh Siamsin Annual Sports Meet, 2009 honna nei diing hi. Tutung Siamsin Annual Sports Meet 2009 diing toh kisai in, Delhi Siamsin te innpi 4 (four) a khen in om a, Patron honna mualliam santa te min zangin innpi min kiphuak hi. Huai te - Pu Jelshyam, IAS; Pu T Thangthuam, IPS; Pu T Gwite, IPS leh Rev (Pu) T Jamkhothang te ahi. Hiai Sports Meet uap a leh kimawlna tuamtuam te a kihel diing in kuapeuh mah Chial leh Lam-et ihi uhi. Ngambawm 'A' leh 'B' team (Papite) te adi'n Football Match, Khupching 'A' & 'B' team (Nupite) te adi'n Volley Ball Match leh Junior Thanghou leh Liandou te adi'n Football match leng a om diing (for details please refer Siamsin Bulletin Sept. 27, 2009). Sd/- Sports Department, SSPP JHQ(D) P.S. Opening Ceremony Programme attach file ah a et theih diing. Huan, Papi leh Junior te kimawlna a Min kigelh khalou te, theihkhelh/gelh maih khak ahih man in kuapeuh (hiai category a om tengteng) tel theihna'ng a kibawl ahihman in, ahun chianga tel chiat dia Chial leh theihsak ihi uhi.

Brief History of SSPP Delhi Since 1981 | 25 Years of Siamsin

[Note: Siamsinpawlpi (SSPP) Joint Headquarters in October 11, 2005 ni in Sai Auditorium, Lodhi Road, New Delhi ah Delhi a Siamsinpawlpi om kum 25 chinna '25 Years of SIAMSIN' chi in ana lawm in om hi. Kum 25 paisa a SSPP Delhi khangthu tamlou hiai a nuai a bang tamlou kaihkhop in om thei hi.]

SIAMSINPAWLPI JOINT HEADQUARTERS: NEW DELHI

N-362, Sector - VIII, R.K.Puram, New Delhi - 110 022

Siamsinpawlpi Delhi a kipat tung a kipan a tuni tanpha a honpii i Biak Pathian min i phat a, kum hiai zah a phak theihna dia phatuamngai taka abul ana pan tute, i pawlpi adia ana pang gige te leh i heutu masa te zahna lianpi i pia hi.

1980 malam pek a kipan in Delhi ah eimi siamsin leh sepna nei i na om tham ta uhi. Himahleh pawlpi min a kipawl khawmna leh sep-le-bawl bangmah na om ngeilo a, 1981 in All Zomi Students’ Association (ALZOSA) ana pan khia ua, ALZOSA min zangin kipawl khawmna ana nei zel uhi. Huchi kawm karah ALZOSA kipat kimvel mah 1981 in Pu Khupchinpau Guite in phatuamngai takin SSPP Membership fee ana khon in pan ana la to ngitnget hi. Huaiziakin SSPP min a membership fee i khon pat ua kipan a  Delhi a SSPP omta ahi chihna ahihmanin 1981 a kipan i sim leh tukum a kum 25 na leh 25th Annual meet/Conference zang thei dek ta i hi.