Hiai project pen khawlmai deihhuai salou in, Delhi BYF in leng tukum chihchu December 2010 sung tan in, Rs. 100,000 mah muhkhiak I sawm in, Project Nehemia-II chih minvuah in panlak I sawm nawn uhi. Pathian hauhsakna muangin, tualaite lakah, box akihawm banah, hiai I biakin nungah Project Nehemia box akikoih a, chiklai peuh a panpihna khiak theih ahi chih kahon gen thakthak hi.
Tukum Project Nehemia-II ading EBC Headquarters a Director of Institutions in proposal ahonthon a, detail I taklang zek ding:
Tukum Manipur board a Cl. X exam na ah Sinjawl a I saptuam High School in 100 % pass percentage hon muh kia hilou in, candidate mi 4 in 1st division in zou zawmah uhi. Hihhoih lawtel uh. Alangkhat lamah, sinjawl school pen high school dia govt. recognized ana hihlouh manin, Thanlon Convention High School min a Board exam ana pedan uh ahi…
I saptuam in leng, recognized theih din pan hon la ua, huaidin Science laboratory leh School library, sinjawl school in poimoh ding a, December 2010 chiangin, Enquiry Commission ten Sinjawl school mahmah vapha ding ua, a lungtun uleh, recognized theihmai didan in gen uhi.
Hiai proposal penleng kingaipoimoh in, BYF Committee in a 2nd meeting 10 July 2010 hun in, Sinjawl HS in high school Govt apat recognition ahon muh ua, siamsin tampi in ahon phattuampih lamet na tawh, Singjawl school a ding Science laboratory leh school library bawl nangin, Rs. 30,000 ki approved a, July 13 in EBC HQtrs. kithon suk ngal hi. Tukum a Project Nehemia-II phase I panla theidia I om manin, I biak Pathian thupina I pia hi.
Banah, proposal dang Director of Institutions apat in ahong lut lai a, Huaipen ahihleh, Vangai Division sung a om, Dawltang khua a CES ahi. School building a nei kei ua, school naupangten Dawltang YPA hall pansan in class lajel uh hih tuak. Hiai proposal leng lungsim ah om mahmah hi. I pangkhawm di ua, Ginna tawh pangin, hiai project I sepsuah theihngei I lam en hi.
Thukhitna din, Delhi a omte kha, bangmah kisa kholkei lele, mundang a omten hon suang gu mahmah uh chih gentam ngai hetlou in kithei hi. Huchi kawmkawm in, inlam I awlmawhlou theikei. I gam a thiltung tuamtuam te khawng in laisiamna a poimoh dan hon kawkmuh deuhdeuh a, bang chitukin panla lele, a poimoh zaw laisiamna mah hiveh aw. Laisiamna mah ahi i-nam, i-gam, i-saptuam hon tundingtu ding. Huai din pangkhawm ni…
I biak Pathian adia kal I suanna khempeuhte uah I biak Pathian in hon makaih touzel hen.
-
Baptist Youth Fellowship
Delhi
No comments:
Post a Comment