Indian Forest Service 2010 Exam final result tu naichin a suak ah, Candidate 85 te’n lohchinna ngah uhi. Huai te lak ST mi 7 lak in om hi. I Siamsinpih uh Tg. Siamkhanmuan Guite in lohchinna ngah hi.Amah Rank82 rank in pang hi. Unaupa Tg. Siamkhanmuan Guite, Pu Thawngchinthang’ tapa 3 na ahi.
Bio-data of Mr. Siamkhanmuan Guite, IFS
Min: Siamkhanmuan Guite
Pa’ Min: Thawngchinthang
Pa’ sepna: Govt. Teacher
Pianna khua: Ngaljang Village
Khua: Lailam Veng, Lamka
Tulel a omna: JNU, Narmada Hostel, New Delhi
Piankum: 08.09.1984
Hobby: Play & watching football
Educational Background:
Class – X (HSLCE-2000) – Blue Star Academy – 61%
Class – XII (Sc) – Rayburn College – 61.5%
B.Sc Chemistry (Hons) – St. Peter’s College (NEHU
Shillong) – 70.25% (3rd Position holder, NEHU)
M.Sc (Environmental Science) – JNU, New Delhi (4th
Semester/Final year)
Extra-curriculum activities:
President, SSPP Blue Star Unit (2000)
Amah toh SSPP JHQ Delhi te’ houlimna anuai abang in i taklang hi:
Lohching na hi chih na kitheih a "na first reaction" non gen masa diam?
Result ka muh in, huchi dan a reaction banghiam lua leng ka nei tuan kei. Normal tak in ka om, chih di hi’nteh. Ken kana expect ziak le ahithou ding. [Ahi di mah dan a ka koih ziak ahi diing]
Bangzah vei attempt na pia a? Na ki lam-etna tan tung in na ki thei hia?
IFS nihvei ka attempt na ahi. Lametna tan tung kihimailou di hia lohchinna kingah hiven.
Civil Services la nana pengei hia? Bangzah vei na peta a? Na piaktouh zel sawm lai hia?
Kana pengei a, mains nih (2) vei kana gelhta a, Prelims chu 5 vei ka peta. Ka tup pen IAS ahihman in piaktouh zel ka sawmlai.
Civil services bangziak a nana piak ahia? Nang lunglutna hia ahihkeileh nu-le-pate deihsakna ziak?
Bangchik akipan in Civil Services/IFS adin preparation na pan a?
Ka pa’n IAS din honna deih tinten a, ahon gen pih zel. Ama hon encourage na tungtawn in kei ah lunglutna ahon guan. Huchi’n, ka hong lunglut.
Exam di toh kisai a preparation na bawl dan la? Ahihleh, haksa na tuah te ah bangchi'n pan na la (overcome) a leh?
Ka hun zatdan-niteng in dakkal 6 (6 hours-daily basis) lai ka sim gige a, exam dek chiang inchu huaisang a tamzaw kasim. Haksatna ka tuah ahihleh eimite’n laisim tam chihkhawng i kipahpih naikei uh a abang a, laisim tam te khawng chiamnuih na din izang ua, mi chiamnuih le ka tuakkha mun sim. Ban ah, sum-le-pai a haksatna kana tuak. Hiaite thumna leh positive mindset nei in ka overcome zel hi.
Hiai exam a na lohchinna ziak non gen thei diam?
Ka lohchinna ziakte: Hardwork (kuhkalna), mahni ki thununna (Self-discipline) leh Nu-le-pa thumsakna leh Pathian vualzawlna, hi’n ka thei.
Hiai exam diing toh kisai in Coaching na la hia? Na lak leh, koi ah? Civil service exam pe dite aa d’in coaching poimoh teitei hi'n na thei hia?
IFS adin a tuam in kana la tuankei. Civil Services adin Career Plus ah Chemistry optional coaching kana la a, hoih kasak khollouh ziak in a course zoulou in kana tawpsan. Coaching lak teitei ngai kasa kei a, himahleh guidance poimoh kasa.
Exam na a di'n laibu na refer deuhte bangbang ahia? Magazine/ Newspaper/ Journals bangbang na sim deuh a?
Science background apat ka hihman in adiak in social science lam ah a basic theihna din NCERT textbook te ka hah sim. Indian Constitution adin D.D.Basu laibu hoih kasa mahmah. Economics ah Spectrum te aa ka en. Magazine ahihleh Civil Services Chronicles leh Competition Wizard ka enkhawm. Newspaper chu The Hindu ka sim a, article te ka stress deuh. News magazine lam chu hun le om khollouh toh ka sim se kei.
Civil Services bangchik apat nana ki prepare a? Na optional te bangbang a?
Ka graduate zoh, 2007 apat kana ki prepare a, optional kha Chemistry toh Botany kana la a, Botany ka hihhoih kei a, Agriculture in ka khek nawn. IFS ah leng Chemistry toh Botany mah kala.
Na ki prepare lai a na hihkhelh hia na theih om hia?
Kana hihkhelh aka theih chu optional ka tel khelh ahi. Ka first optional chu Chemistry, graduation a ka subject ahi a, ka comfortable mahmah. 2nd optional din Botany kana la masa a, ka comfortable zoukei. Huaiziak mah a civil services ana lohching zoulou kahi. Anawn in Agriculture in ka kheng.
Civil Services a i success rate uh tulai a a hichi hoihlouh bangziak hi’n na thei a?
Kei muhdan in kuhkalna i taksap ziak uh ahi. Laisim ki chimtak pah, a nuamnuam ki-ut. Lai i siamlouh ziak uh hilou ahi. Chi maile, hiai JNU a Vaite bang le library khawng a laisim dia giahkuan top mai uh ahi. Huchi a lohchin kei uh lehle lunglel tuanlou un, chiimtak tuan lou uh. Pethak lai thou ahi uh.
IFS ah bang cadre na tel a?
State Cadre (Home State) chu ka tel ahi.
Personal interview na toh kisai la non hilh thei cheuh diam?
Ka interview lai un board member te a cordial mahmah ua, nuam mahmah, chih di ahi. IFS lam ka lunglut ziak khawng a hon dong ua, ken science background leh ka zilna lam toh kisai ahih ziak in lunglut huai lua kasak dan ka gen hi. Manipur dinmun tomkim tak in, minute khat sung hong gen in, chi a sana en zeen a dawng dia kisak in ka huphurh sim. Himahleh, Manipur History leh tulel dinmun ka gen leh minute 1 sung hun ka zang bei zou (nui kawm in). Ka experience khat ahihleh, interview board te’n i nature omsa hon dot khiak sawm uh ana hi lel tak un chin, va acting luat hoih in ka thei kei.
Ahihleh, interview na ah, dawng fuh na kisakna pen la?
First member in, situation khat hon bawltawm a. Na sepna (posting) mun ah, gang chi 2 a om a, na boss pa leh State Chief Minister (CM) pa toh tua gang pawl te aki zom ua, himahleh, gang a zopte uh kibang lou uh. Huai te kal ah tehtuah in om le chin bang na chi’n na solve dia? Chih a hon dong ua. State Govt nuai a sem ka hi kei a, Central Govt nuai a sem ka hihman in, CM pa gen/fuihna diklou ahihleh ka zui kei diing. Aman ka tung ah action ala thei di’n ka ging kei. Alaktheih sun transfer ahi mai. Huai pen poi sa lou ka hi, Koi mun peuh a sep poi sakna ka nei kei. A boss pa inleng adiklou a thil pei ahihleh ka zui tuan kei dia, hiai ziaka ka sepna taan ka tel zaw.... chi’n ka dawng a, board te lungtunna tan a dawng hi’n ka ki thei.
Ahihleh, interview na ah dawng khial hi a na kitheih a om hia? Ahihkeh, dawnna na piakna ah tunung a ngaihtuah chiah, huchi lou deuh in dawng kha leng, na chih a om hia?
Dawng khial lua chi a ka gen di ka thei kei. Kei ki koihdan in dawng fuh vek hi’n ka kithei. Ahihziakin, huchi lou dan in dawng kha leng, chih chuh ka nei. Corruption toh kisai hon dotna uah, ka gen suksuk leh ka theih chet hetlouh khat ka va gen pen se hi. Lokayukta toh kisai ken a latest development kana ki update khaklouh ka gen kha laizang a, huai toh kisai hon dot sau uh leh, “theilou” chi a ka dawn maimah a ngai mawk. Hon dotkhak louhpi uh ken kava gen kai khak sese kisia sim ka hi. Hiai a ka experience khat ahihleh, theihchet louhpi va gen khak hetlouh di. Sense of direction bang leng ei bawl theih om lo dan ahi.
Chi lailai le, na interview na ah, board te nava hih nui kha hia?
Hi. Ka hobby toh kisai dotna ah. Football kimawl leh a et nanana chuh kitaima leh ki lunglut ahih chiang a, WC 2006 a head butt toh kisai, Germany player khat in, hon chi kha ua. Kenle, Germany te hilou a, France player Zidane ahi, chi a ka correct leh, board tengteng a nui zaizai uh.
IFS tungtawn a igam ua bang sepkhiak theih om din na ging?
Service toh kisai lam bel ka theitam kholkei a, himahleh plantation khawng ngaih poimoh huai kasa. Singnou suan hahbawl le. A tamzote nekzonna shifting cultivation ahi a, hiai alternative om ngei ding in ka gingta. A productive zaw, horticulture bang hahbawl a hiai tungtawn a tua sanga nuam zodeuh a nekzonna om ngei din ka gingta.
Indian Forest Service na hi ta a, ahihleh Zogam a sing-le-loute kepbit a poimoh na ziak tamlou na hon gen thei diam? Banah, hoihtaka kepbit ahih theihna diinga panlak didan tamlou na hon gen thei diam?
Science background ka hih ziak in, hiaitoh kisai ah ka gen ut ahihleh leitang (soil) a poimoh masa penpen ahi. Thil tengteng kingakna. Soil quality a hoih nadia plant cover hoih om ngai. Soil cm khat a man leh a a ki recover nang a kum sangnih lut kichi. Hiai hoihtak a kepbit ngai. Hiai i kepbit theihna dia chu plantation hoihtaka hih ngai.
Sustainable development omtheihna diing in Alternative source of livelihood bangbang i gam uah om thei di’n na thei a?
Singnou suan hahbawl ding. I gam a bang sing (trees)/thei(fruits) hoih a chihte theihsuah a, huaite hahbawl ding, hilele tua dingin saupi kivei ngai maithei, a market bang, connectivity bang le a om ngai ding. Hilele pan photphot peuhmah le maw a hitheilou omlou ahi.
I gam ua sing-le-lou kepbitna di toh kisai in mipi kiangah bang na vaikhak nuam a leh?
Tomchik a gen in, Sing-le-lou te’n leng hihnna nei ahih man un mawk bawl louh diing ahi. Amau leng hing nuam uh ahihman un hoihtak leh pilvangtak a kepbit ngeingei diing ahi. Preserve kawm a zatdan siam, sustainable use siam poimoh mahmah ahi.
Sing-le-lou kepbitna diing toh kisai in community/civil society (mipi) hih theih bangbang om hi’n na thei a (Govt. Lam apat bel hilou phot in)?
Community/civil society ahih keileh mipi lam apan in hihtheih diing chi nih a khen theih om hi’n ka thei:-
· Social Forestry – lamdung leh khosung khawng a singnou suan diing, huai in weather bang leng control mahmah. Nipi lam chianga singliim khawl theihna mun nuam leng hi diing.
· Agro-forestry – lou a singnou suan a, huaite apat thil piang sum suah theih diing bangbang te suan diing. Lou a i haichiin te toh ki nang buailou diingte.
Nidang a imi masate uh leh tulai khangthak (younger generation) te Siamsinna lam a na muhdan bang ahi himhim aleh? Kuhkalna lam hi’n, haksatna leh adangdang ah .......
Kei muhdan in i mi masate uh leh tulai khangthakte lak ah difference om mahmah in ka thei. Tulai khangthakte aki thadah deuh a, kuhkalna ki tasam mahmah hi’n ka kithei. Huai banah, tulai khangthakte’n nopsak baih kisawm lua. I mentality uh lai sim tamlou a sum tampi muhtheihna di lam pang hah bawl deuh ihi di ua aw, ka chi. Globalisation/ Economic liberalisation ahih toh private sector tuamtuam ah tampipi loh a septheihna omte lunggulh baih lo deuh ahi di ua aw, chih ngaihdan ka nei....
Lohchinna di’n mundang a om khiak poimoh hi’n na thei hia? Ahihkeh.....
Hiai gen tang chet di haksa kasa. Mundang a va om khiak a lohchinna va ngah teitei diing chihna om in ka thei kei. Eimah (mimal) mahmah ah kinga hi. Ka chihna ziak ahihleh, ei mahmah pang ngai a, kuhkal ngai. Mahni ki discipline zoh a poimoh. Lamkhat ah omna mun/ sinna mun bang leng a poimohna zaw om thou mah hi. Atmosphere conducive deuh mah le poimoh. Himahleh, theih dia hoih pen ahihleh, koimun peuh ah om le hang leng, i tup taktak leh lohchin mohna a om kei.
Mundang va paikhiak in lohchinna 100% hon guarantee tuanlou ahi.
Tulel in, Innlam a Siamsinna dinmun bang chi’n na mu a?
Government lam chau lua kasa. Private school bel a se lo kei. Govt. Nasemte’ gin-omlouhna ziak ahi deuh pen dia.... College ah bang leng Bachelor Degree tan zil theihna tua saanga hoihzaw dia bawl theih dan om leh, achih huai mahmah. Higher Secondary tan chuh hoih tadih in ka thei.
Mi khenkhatte’n SSPP leh khotaang vai a Siamsinte ki hahzat luat ahoih kei achi ua. Nang ngaihdan la?
Siamsinte social thil a kizatna toh kisai point 2 in a khen theih di:-
· Khotaang a kihelna pen vualnopna leh enjoyment dan a la kha in siatloh thei mah uhi.
· Khotaang a kihelna pen thil zilna khat ahi. Mahatma Gandhi in Education is all-round development ana chih dik mahmah hi.
Khotaang a kizatna in ei ah i confidence a hon build up thei a, i personality bang leng ki develop thei ahi.
Kei ngaihdan in bel, Siamsinte social thil a ki involve diing, himahleh i purpose theih a, vualnopna leh khanvual kipolhkhawmna dan maimai a zatlouh hoih kasa.
Ahihleh, Siamsin/sinlai khotaang (SSPP, etc) a kizang kha te kiang ah bang vaikhah nop na nei a leh?
Khotaang thil a ikizat leh phatuam thei pen dia pang diing. Phutawk isak bang in mite’ recognition i ngah kholkei mai thei.
Lunglel leh lungkiat hun bang leng a om diing. Himahleh, theihsiamna a poimoh a, thuakzou taka pang, pawlpi purpose (na hoihsep leh adangdang) theih a, huai dia chihtakna toh kizat diing. Huaichiah, khotaang a iki zatna pen ei hon motivate tu a pang sak sawm diing ahi.
[Siamsin Bulletin | February 27, 2011]
No comments:
Post a Comment