~ K. Biakkhanmang Guite
Nidanglai pi-le-pute’n kumteng a buhbuuk a buh tam theipen seekkhawm ding tuh a ‘year plan’ uh thupi pen ahi hi. Buh hauh bang kisialna in na zang hial uh hi. Khovel paidan kikheng zel in tuchia’n bel nu-le-pate’n tate lehkha zilsak leh sepna hoihtak neihsak ding tup lianpente lak a khat ahong hita hi.
Lehkha zildan bang ah leng apaidan kikhek zeel in, naupangte lunglut di dandan azilsak tuh ahiding dan angaih hita hi. CBSE bang in pawl 10 exam grading system hon pan khia ua, subject khenkhat haksa sakziak a naupangte lak a exam lauhna leh amau lungsim’ puakgik dawnzaang ding ngimna lianpen hidi’n ginhuai hi. Pawl 10 tuh lampi kathuam bang ahi, tua hun a lunglutna, tempaina leh ei khosak dan toh kituak a bang line apai ding chih mimal in theihtel a, tua I lunglutna lam mah pawl 10 zoh hun a paipih theih hileh hoih ding hi. Pawl 11 & 12 a technical or science subject la a graduation course a non-technical a kihei chihleng omthei a, himahleh non-technical apan technical lam a kihei chihbel thil baihlam ahi kei. Bang lam I paipih ut a, damsung a I sep ut nna bang hihiam chih, pawl 11 & 12 hun a theihtel hoih hi. Lohchinna mimal ginomna ah kinga lian mahmah ahihman in school leh college minthang lou tan khak in leng lungkiat ding hilou hi.
Pawl 12 zoh chia’ bang line, bang college a lut ding chih dotna lianpen ahizel hi. Medical/Engg/Nursing/IT & professional line tuamtuam zil nuamte adi bang in pawl 12 zillai mah a huailam luuttheihna JEE etc chihte ngaihven pah hoih hi. Pawl 12 mark muhdan apan interview tungtawna admission muh theih namun leng om tham hi. Alang lamah line tuamtuam subject combination hoihtak toh teel theih hi. Arts, Science, Accountant, Management, Economics, Commerce, language etc om hi. Ahihtheih leh Institution piching, Govt approved te mah a zil hoih hi. Hiai lampang i theihtel louh thilte teacherte, seniorte hiam leh huai line ana theisate dot zel hoih ding hi. Interview napeuh ah degree ngahna subject apan dotna hon bawl tangpi ahihman un, I subject sung a thu omte theihtel poimoh hi. Kitaitehna sangtak laka tai dia kisak ding chihna ahi.
Thupil in ‘abul patdik akimkhat zohsa’ a nachi hial hi, final exam chiang a dia’ lehkha sim ding siit lou in class kipat apan patpah pilhuai ding hi Innkuan a om, inn pansan a school leh college kai bang I om a, huai lou hostel leh innluah a om leng I om bok hi. I tup lamen a kal isuan lai in hon lohsam sak thei thil tampi om ahi chih phawk ni. Sum zatdan, hun zatdan, lawm polhdan, kicheidan leh a dngdng pilvantuak tampi om ding hi. Internet & mobile phone khawng a hun manpha tampi sukmang theih ahi kideek ni. Pawl suan theihna maimai leh graduate hihlel ding ngaihtuah hilou in tupguhna toh lohchin ngeingei sawm in pan la ni. Subject hoih lou a om kei a, mitam zaw zuih lamlam vazil leng hoihkim khollou thei hi.
Ahaksa itot leh izil khak in leng ‘zohlouh ding omkei’ chih lungsim toh pan angai hi. Lohsam I kisak hun in leng tua lohsapna pen lohchinna dia kalbi hoihpen ahi chih thei in lungkelou in pan lathak ni. Mimal I lohchin chiang in innkuan lohching I hong hi a, society lohching I hong hithei hi.
Siamsinte kisiak ni!
[Siamsin Bulletin | June 20, 2010]
No comments:
Post a Comment