Thursday, 23 June 2011 10:27
Kim leh kianga ginglou mite’ festival tuamtuam te a va kihel khelhna ahi diam? Or Prasad nek siang hia?
Dawnna: Sawltak Paul in “Thil bangkim hih a siang a, himahleh, thil bangkim hih a hoih khol kei,”( 1 Kor. 10:23) achih bangin Gingtute adi’n bangkim hih, koi mun peuh a hoh a sianga, himahleh, mun teng a hoh a hoihkim kei ding. Khalam khanna ding hiam, midangte Toupa khe bula pina ding hiam, banah, Toupa min thupina dia kalsuanna peuhmah amanpha dinga, himahleh, tuabang ding lungsima leng neilou pi midangte festival a vatel maimai hiam, prasad nek hiam in phat tuamna bangmah a neikei ding (cf. 1 Kor. 8:7-13; Rom. 14:1-21).
2. Haksatna I tuah chiangin Toupa lamah bangchin pan I la thei dia? Or Lamet bangmah I neih nawn louh chiangin Toupa Pathian ah bangchin iki nga thei lailai dia?
Dawnna: Haksatna, lohsapna, lungkiatna thuuktak I tuah chiangin Lametna Hing (living hope) Toupa Pathian ah om hi chih I mangngilh hetlouh ding uh ahi (1Pet. 1:3-12). Khovel ah lamet ding neilou banga na kitheih hun in Toupa kiang zuan in. Hiai khovel adia siam na hihlouh dan ahon phawk sak dinga, tua in Toupa lam hon naihsak semsem ding hi (1 Thes. 4:13-18). Hiai khovel a na lohchin/lohsap ding pen Pathian concern masa ahi kei a, bangchibang hinkhua/circumstance ah om mah le chin amah a dia muanhuai leh amah min thupina diing kia a hing ding-Khrist batna nei a- tua dinga hon lamen ahi zaw.
3. Khovel (I gam=lamka?) siatna toh kisaiin civil society ten loh didan theinawn lou uh abang. Saptuam inle diktatlouhna accommodate gawp hilou ihia maw?
Dawnna: Khovel paidan (worldly norms) in hon influence mahmah ahi chih bel haih vuallouh ahi. Himahleh, gingtu mimalmal te’n Khrist batna neia niteng hinkhua a kal I suan chiang un gingtute kipawlkhawmna saptuam/fellowship hong siangthou in Pathian Kumpigam mit mahmah a muh theih in hong kilang ding hi. Khelhna leh siatna bel hong bei mailou in hiai khovel ah hong pung deuhdeuh ding hi. Tuabang hun in, Toupa ah muanna nga in, amah thutak ah kibulphuh gige le’ng bangmah in hon lingsak zoulou ding hi.
4. Jesu a hotdamna I san nakleh Baptisma tan kul sese lou chihna ahi diam?
Dawnna: Hotdamna (salvation) leh Baptisma kilamdanna theih khelhlouh ding ahi. Hotdamna ichih chiangin mikhial- tangtawn manthatna a pai ding lai- Jesu Khrist sisan a ngaihdamna ginna a sanna ahi (Eph. 2:8). Tua Jesu Khrist tungtawna hotdama om dingin Baptisma hiam thil dang bangmah sep/bawl angaikei hi. Mikhial kisik a, Jesu Khrist ginna a Pathian’ lam ahongkik nawn chiangin hotdam/piangthak kichi hi. Baptisma bel Saptuam (nungzuite’) thuseh- sacrament- khat ahi. Pianthakna dinga Baptisma tan ngai hilou in dan zuih kimna leh siangthouna lampi zuihna- Khrist nungzuihna, (Matt. 3:15) gingtute’ hih ding thuseh ahi.
5. Pathian’ mitmuh a I manphat dan kibang vek ahihleh bangchidan a azawng leh a hau om tuam se ahi ding- a lohching baih deuh leh lohching theilou deuh bang?
Dawnna: Pathianin a thilsiamte a et chiangin kilawm sa in lungkim mahmah hi ding hi (Gen. 1:31). Tua bangin, khovel a kibatlouhna hiai zaha tampen Pathian theihlouh hi peuhmah lou ding hi. Laisiangthou ah Ecclesiastes leh Romans gelhtute’n hiai kibatlouhna toh kisai a mihingte’ haksatna/theihsiamlouh thu bangtan hiam na genkha tuaktuak uhi. Pathianin thil peuhmah amau hun in kilawmtakin siam hi (Eccl. 3:11) chihleh, mihing’ lunggulhna leh panlakna a kinga hilou in Pathian hehpihna a kinga ahi chih (Rom. 9:16). Lungsim hat deuh, hatlou deuh chih bang, lungtang nem deuh, khauh deuh chih bang leh thil thei baih deuh leh thei hak deuh mihing ki om tham hi. Himahleh, tuabang ten Pathian kiang I naih ding hon dal peuhmah lou in Amah adia manphataka khovel hinkhua I zat theihna dingin ihihna bangbang Toupa’n hon sang hi (Rom. 1:18-32; 8:28). Sangtak I tun theihna ding Pathian in hon dal a, midang tawmchik tunga tua bang hamphatna nga hilou zaw in Amah min thupina dia ikizat utna tantan tungzou dingin Pathian in hamphatna hon pia hi zaw ding hi. Na zawn leh na hauh ah Pathian buai ahikei a, amah dia manphataka hinkhua na kizat leh nakizatlouh Pathian’ buaina ahi zaw ding. Mihingte’n thupi isak leh lohching ichih tampite Pathian ngaihin bangmah lou hi khazaw ding hi.
6. Ka hinkhua ah bangchin Pathian hon sehsak lampi (God’s will) ka theihthei dia?
Dawnna: Michih kiangah Pathian’ kilakdan kibang kimlou dinga, Pathian’ hon zat utdan leng kibang kimlou ding hi (eg. Abraham, Moses, Joseph, Paul, etc.). Huchihlaiin, michih adia theihtuah mahmah, Pathian’ hon sehsak lampi theihsiam dingdan bel- Pathian’ tangtawn thiltup (God’s eternal plan) theih masak ahi. Aziak bel, michih in tua Pathian’ tangtawn thiltup tangtun na dingin role kinei chiat hi. Nanga pianken hihtheihna (gifts) leh kisinsiamna (training/discipline) tungtawn a na kizat theih dan (potential) pansan in Toupa adin manphatakin na ki zang thei gige hi. Himahleh, Toupa’n mi tengteng adingin i niteng kizatdan ding (daily activity) hon sehkholhsak detdet khollou hi ding hi. Thamlou in, Pathian’ deihdan tung zoulou mi zong kitam mahmah ding hi (eg. Kumpi Saul). Huaiziakin, Pathian’ tangtawn thiltup thei a, tua tangtun na dinga Pathianin na sep theih ding hamphatna (opportunity) hon pia hi a na ki theihna leh tua dinga thupukna (commitment) na bawl tungtawn a na hinkhua na zat pen Pathian’ hon sehsak lampi hi ut mahmah ding hi.
7. Naungek ka hihlaiin ka nu-le-pate’n Pathian kiangah hon lan ua, tu’n le Pathian nasem in kizang leng chih ahon lamen gige uhi. Ken lah tua banga kizat ding lunglutna ka nei thei hetkei a. Kei lunglutna dan in ka hinkhua kizang suak leng ka nahlawh a peek diam?
Dawnna: Nu-le-Pate’n bel tate maban /career ding duhthusam in tamtakten Pathian kiangah ana ngetsak sek uhi. Tua bang dingin nakpitakin hon kisinsak in sum-le-pai zong tampitak ana seng uhi. Himahleh, nu-le-pate’ hon lametna tung zoulou, limsaklou, kitam mahmah a poilua hi. Huchibang kalah, khenkhat te bel nu-le-pate’ muhpih tan mai hilou in tua sanga sang zaw a hinkhua zang zong ki om ding hi. Ahi a, Pathian deihdan toh kituak a hinkhua zatna toh kisaia theihtuak bel, tampi vei na thum nunga nang’ hihna toh kituaka na sep theih ding nna na lungkimna (satisfaction) hong om pen Toupa hon sehsak hi kha ding hi. Ahihkeileh, Pathian min thupina dia na sep ding nna na lungkimna omlou hiam, na career ding Pathian’ hon sapna chiangtak omlou, nang leh nang a decision/commitment bawl theilou na hihleh bel , na nu-le-pate’ hon deihsakna masa mah Pathian’ hon sehsak hi kha ding hi (Eph. 6:1-3), thumna toh delhzuiin.
Source: ebccdelhi.org
No comments:
Post a Comment