BANG HUN A DING I HI UA?

Khovel a society khatpeuh thakhat thu a khangtou chih a om ngeikei a, awlawl a leh hunbi (stage) neitaka upat dungzuia piching hizaw uhi. Tua ahihmanin, society ahihkeileh nam khatpeuh tulel a adin’ na uh (present stage) in ahihna uh taklang hi.

Huchi ahihleh eilawi (Paite nampi) bang dinmun ah i ding ua? I unau pih namdangte bangin eilawi in leng stage tuamtuam ana paltou in tu’n hiai dinmun ah i ding uhi. I minam pen i et vengveng chiangin late1940’s or early 1950’s lakvel khawnga khanglou pan diangdiang i hisim uhi. Tua ahihmanin tuni chiangin i minam pen a upa nai hetkei chih ding ahi. Nampi dana i kipat tung un khotang vai ah mipi kipezou in phattuam ngai uhi. Abanah, siamna-pilna lam ah khanlohna nasatak hong tungin , siamsinna lam ngai poimoh in nasatak in i thuap un i phungvuh uhi. Huanah, kum 2000 lakvel apat khawngin khalam ah nasatakin khanlohna hong om nawn leuleu in ahoihpih lah tam, asiatpih lah tam in saptuam lam nasatak in i pibawl uhi. Hiai hunbi pen ei kia hilou in namdang te’n leng ana paltouh uh ahi a, atam zaw (Hmar,Kuki,etc.) ten ana zohsa uh tua en phatou pan liailiai i hi lel uhi.

Tua ahihmanin eilawi pen hun (stage) poimoh mahmah leh decisive mahmah phase a ding lel i hi uh (aziakbel transitional phase ahihziakin).Tulel a i din na un tangtawn hon daih louh ding kia gentaklouh kum5/10 tan kan daih nawnlou ding bang hi, i lunglutna leh tawndan (lifestyle) nasataka hong kikhengta ahihmanin.Hiai hun i pelh chiang un bel ei sanga ana nampi zawte tulel a a’dinmun uh closed/ individualistic society, kuamah kingaihsak ngellouh leh kiphawkkha vetlou leh kipoimoh vetlou hun (stage) ah i ding ding uhi. Tua i dinmun ua i ding sung ua thildang ngaihsak lou a i buaipih kia uh i buaipih uleh den chiangin hiai Shillong tanga agam neite i bat khak ding uh lauhuai hi. Tua ei adia phattuamlou leh poi i sak hetlouh leh i ngaihsak hetlouh te’n tunung chiangin i nampi adingin gen nei mahmah dinga, i tu-i tate a dingin poi ban mahmah ding hi,tu a i poimoh ngaih a i haipih te sangin. Akilawmsak na in thil hih kei ni,chihtakna toh i saina lam chiat sai in sep sawm ni. Huanah, ei sung kia a fel leh chethei te kia thuaplou in pakta kei ni. Khat- le- khat ki domkang tuah din panla ni. Khristian i hih chiat man un ei hon tanpa i Toupa Jesu nungzui din kisa ni, huaituh saptuam kia buaipih lou in Pathian mah buaipih zaw in i mihin’pihte panpih in leh dopkang sawm din kisa chiat leng houh vangam i lut pen zaw mai diam maw...

Suankhenmung Shoute
President SSPP JHQ Shillong

[Siamsin Aw | June 19, 2011]